توته فى حدوته

فى يوم زى النهاردة قابلت أول حب فى حياتى ، حسيت بأبتسامة و سعادة ما عرفتهاش قبل كده و مشاعر بتنبض بالحب ما لمستهاش الا عنده هو بس ... أتغيرت الدنيا كلها فى عنيا حبيت الشتا و الصيف و الليل اللى كنت بأخاف منه ، حسيت أنى زى الفراشة اللى ليها أجنحة ملونة بتطير من غير حدود و لا قيود لأول مرة بأحب و ما خافش أن الحب ده يبان عليا لأنى فى دنيا جديدة مش المهم نوصف ايه هو الحب ده ، المهم أننا بنحب علشان كده عايزة احكى لكم حكاية حبى الأول توته و هى دى أول حدوتة هأحكيها ليكم النهاردة و توته هو طفلى الأول اللى دخلنى دنيا الأمومة ، كتير حلمت من صغر سنى أن يكون ليا طفل أشيله بين دراعى طول النهار و أضمه بين أحضانى طول الليل و قريت كتب كتير من اللى بتهتم بالتربية علشان أكون أم مثقفة وواعية فقريت أنى لازم أكلمه و هو جنين علشان يتعلم اللغة و يسمع كل حاجة حواليه وعلشان كده أنا بألفت أنتباه كل أم أنها لازم تتكلم مع ابنها قبل ما يتولد و تغنى له علشان يتعود على صوتها و يعرفها لما يتولد ، و بعد الشهر الأول من الولادة بدأ توته يسمع أصوات الناس اللى حواليه و ينتبه ليهم خاصة ليا أنا لأنى أنا اللى كنت بأتعامل معاه بأستمرار وبدأت بينى و بينه علاقة حب من نوع تانى خالص و على رأى صلاح جاهين لما قال " يا طفل ياللى فى دمى ناغا و حبا علشان عيونك يا صغنن هويت " طبعا كل أم بتهوى الدنيا علشان أبنها موجود فيها و بتعمل له كل حاجة هو عايزها فبدأت أكلمه و أغنى له علشان عرفت أنى لازم ألاحظ قوة السمع عنده و هل هو بيستجيب لصوتى و لا لأ فكنت بأغنى له لما بيجى ينام " أمشى عنه روح للدبة نانو دى كبيرة و تستحمل عنه روح يا برد طوبة للدبة الدبدوبة و أبعد عن حبيبى و اللى فى سنه " و لقيت أنى أول ما بأغنى لتوته الأغنية دى بيفرح فى الأول لأنه أتعود على صوتى و بيعمل حركات بجسمه بتخلينى أحس أن هو سامعنى و بعدين ألاقيه راح فى سابع نومه ، هنا أتأكدت أن الأغنيه ليها تأثير داخلى عليه و أنه بيستجيب للصوت و كمان عرف أن دى أغنية النوم فبينام عليها و هنا كمان أتأكدت من درجة ذكاءه و أنه بيفهم كل حاجة حواليه علشان كده بانصح كل أم أنها تراقب أبنها و تعمل معاه زى ما عملت مع توته بالظبط و لو لقت أنه مش بيستجيب لصوتها أو صوت الباب أو جرس التليفون و أنه ساكت بأستمرار و فضل بالحالة دى لغاية لما بقى عنده 6 شهور هنا لازم الأم تشك أن أبنها عنده مشكلة فى السمع و لازم توديه لدكتور علشان يفحصه و يعرف قوة السمع عنده و الحدوتة الجاية هنتكلم على مشاكل كتير قابلتنى مع توته أحب أن كل أم تعرفها و تتعلم منها .
ماما دودو